Apirilaren 9rako mendi irteera berria antolatu dugu. Kasu honetan Labetxura goaz, Jaizkibel bertan dugun hareharri koloretsuzko paisaia zoragarriaz disfrutatzera. Animatu eta etorri gurekin!
Hitzordua: Apirilak 9, igandea, goizeko 8:30tan Eroskiko aparkalekuan.
Badator Korrika eta motorrak berotzen hasiak gara dagoeneko. Haste honetan Martinek Blaganen petoa jaso du. 1202 km-a dagokigu baina ahal bezain beste, indarra bukatu arte, korrika egingo dugu euskararen alde!
Bestalde, izena eman zuten bazkideen artean lekukoa eramateko zozketa egin zen. Aurten Imanol Galarraga eta Harkaitz Garaialderen artean eramango dute lekukoa. Zorionak!
Topaguneak eta Hondarribiako Udal Euskara Zerbitzuak antolatuta, ostiral honetan, martxoak 17, Laburbira Kultur Etxean izango da arratsaldeko 20:00etan. Euskarazko zortzi ekoizpen ikusteko aukera izango dugu, zortzi istorio, elkarren erabat desberdinak, ordu eta laurden iraungo duen saioan.
Hona hemen kartelera eta informazio gehigarria:
Badugu hurrengo mendi irteera!
Aiako Harrira goaz, Aldurari itzulia egitera.
Animatuko zara?
Hitzordua, martxoak 19, igandea, goizeko 8:00etan Eroskiko aparkalekuan.
Ostegun honetan, martxoak 9, Hondarribiko Udalak eta Soziolinguistika Klusterrak Hondarribian euskararen kale erabileraren inguruan jasotako datuak aurkeztuko dituzte. Aurkezpena Kultur Etxean izango da eta arratsaldeko 19h00etan hasiko da.
Bidasoko Hitzak argitaratutako artikuluan azaltzen den moduan datuak kezkagarriak dira: “Hondarribiarren %60a euskalduna da, baina %25era ez da iristen euskara erabiltzen dutenen kopurua” (artikulu osoa hemen).
Animatu eta etorri aurkezpenera!
Kaixo Blagankide,
Aurtengo Korrikan km bat erosiko da Blagan elkartearen izenean eta, bazkide guztiei lekukoa eramateko aukera eman nahi denez, interesa duten bazkideen artean zozketa bat egitea erabaki da.
Korrika Hondarribira apirilaren 4ean, asteartea, ailegatuko da. Gure km-zenbakia 1202 da eta lekukoa Mendeluko Zubian, semaforoan, hartuko da. Bertan 15:45 inguruan egon beharko da.
Lekukoa eraman nahi baduzu bete ondorengo formularioa:
Korrika lekukoa eramateko zozketa
edo bidali e-mail bat euskarazblagan@gmail.com helbidera zure izen-abizenak eta kontaktu telefonoa adieraziz.
Mila esker eta zorte on!
” INAUTERIA, gizakia naturaren kontra ” liburuaren aurkezpena izango da Edu Zabala Garagartza egilearen eskutik.
Inauteri ezberdinen arteko harremana ulertzeko saiakera bat. Euskal Herriko eta atzerriko inauteriak aztertuz.
Ondoren solasaldia.
Otsailaren 22-an Kultur etxean arratsaldeko 19:00etan, 103 gelan.
Otsailaren 12an berriro Baztango bazter zoragarrietara itzuliko gara. Izpegi menditik ingurune eder hauek gozatuz.
Ederki pasako dugu, zatoz!
Datorren igandean, otsailaren 5ean 20:00etan, ‘Jainko basatia’ antzerkia komedia dramatikoa izango dugu euskaraz Itsas Etxea Auditoriumean. Sarrerak 10 eurotan saltzen dira, 5 eurotan 18 urtetik beherakoentzat, https://ticket.kutxabank.es/ gunean, ARMA PLAZAn larunbata arte eta ekitaldia hasi baina bi ordu lehenagotik Itsas Etxean bertan.
Zuzendaria Begoña Bilbao da eta egilea Yasmina Reza. Aktoreak aldiz, Aitziber Garmendia, Mikel Losada, Tessa Andonegi, Mikel Laskurain eta Andoni Agirregomezkorta dira.
Bi bikote ezkondu elkartzen dira euren seme-alaben arteko liskarrak konpontzeko asmotan; izan ere, bikote baten semeak besteari eraso egin dio. Giza-legez eta edukazio handiz abiatu den bilerak beste bide bat hartuko du, elkarri kristonak eta bi esaten hasten direnean, bata eta besteen frustrazio eta mixeriak azalduz. Ane (Aitziber Garmendia), Alexen emaztea da eta banku baten egiten du lan. Emakume lasaia dirudi, baketsua, alkoholaren aparretan murgiltzen den arte. Alex (Mikel Losada) arrakasta handiko abokatu gaztea da, zintzoa, burlatia, zuzena eta mugikorrik izan ezean, galduta dabilen horietakoa. Xanti (Andoni Agirregomezkorta/ Mikel Laskurain) Veronikaren senarra da. Burdingilea, gizon lasaia eta emaztearen gonapean bizi dena, bileran zehar lehertzen den arte. Emaztearen kontra egingo du bere alderdi ilun eta arranguratsuak erakutsiz. Veronika (Tessa Andonegi) kultura handiko etxekoandre aurrerakoia da. Tragu pare bat hartuz gero itxuraldatu eta erresumindu egiten da, bere frustrazio guztiak azaleratuz.
Euskal Herriko zinegile, norbanako eta herri mugimenduek egindako lanak biltzen dituzte dokumentalen kanalean, herritarron eskura jarri asmoz. 2010. urtean hasi ziren egitasmo honekin eta OSTIRALERO lan berri bat argitaratzen dute. Lan asko ezagunak diren arren, beste asko proiektu herritarrek bultzatutako dokumentalak dira, sekula telebistan eman gabeak. Dagoeneko 274 lan daude ikusgai. Helbidea:
http://www.argia.eus/multimedia/dokumentalak
Era berean euskaraz aurkitu daitezkeen film laburren biltegia aurki dezakegu film laburren atalean. Mota guztietakoak ditugu eskura. Gaur egun 198 lan bistaratu ditzakezu. Sartu ondorengo helbidera:
http://www.argia.eus/multimedia/laburrak
eta gozatu euskaraz!